فلـــــــــــــوس الحواســــــــــــــــم

كبل جنه زغار
وأذكر
حلوه قريتنه وبسيطه
وللعلم بنيان طين
والسكوف تراب تنكت
والهدوم مدسملات
وحالنه يكسر الخواطر
وجانت الجيران غيره
وناس طيبه
ومن تكول فلان
رأسا كال حاضر
ومن تعوف البيت
متباوع وراك
وما تفكر ويه نفسك
شنهو بغيابك يصير
وشنهو يجرى
وخاف
والشيطان شاطر
القريه كلهه تحامي بيتك
ايد وحده
وكلب واحد
تنطر بغض النواظر
وأذكر مريه بسلفنه
أرمله وعدهه يتامى
وجانت الناس برغم عوز الوكت
تعطف عليهه
أويه لكمة زادهه تجيب الدفاتر
جانت من تريد حاجه
محد يكللهه باجر
ومن يجينه العيد
أبوي يروح يتسوك ملابس
يحسب حساب اليتامى
وأحنه جنه نكله بويه
أحنه نكضي الصيف كله بثوب واحد
واليتامى هواي عدهم
ليش ما صرنه يتامى
يضحك وتدوي ضحكته
يكول عدكم ابو واحد
وهم كل القريه الهم ابهات
ونطلب من الله السلامه
يكول ابوي
وياي احسب
كل خرابه تجيب للايتام ثوب
واليتامى شويه عدنه
والخرايب عدنه ياما
ونعرف المعنى بكلامه
وجانت أمي
تطبخ الاكله البسيطه
وتنطي للجيران منهه
ومن تمد السفره نلكه
هواي وانواع الاكل
وأسأل أمي
تكول جيرانك هذول
وكلمن مودي شكل
وماتت امي
ومات ابوي
وماتت الطيبه وأهلهه
وما لتم شمل بشمل
جي على أطلال الخرايب
صارت قصور بعلو
بس الله يعلم
حتى لا أجذب وأزل
كام جاري يفوت من يمي يتكبر
ما يشيل أيده بسلامه
يدكلي هورن
وآنه اشيل ثنين أديه
أهلا بجاري النذل
وأرجع أصفن ويه روحي
هذا أمه تبيع خضره
وهاي من ربح الفجل ؟؟!!!
ونتبهت لحاله صارت
مابقت عدنه خرايب
صارت بيوت شكبرهه
أكبر من أحلامي كلهه
والوجوه الجان لون الطيبه بيهه
شمالهه
شغير شكلهه
الكرامه الجنه بيهه نحس نفسنه
نجوم فوك من الثريا
منهو شكك ثوبهه وحلل كتلهه
بنتي من تكلي بابا
ليش ماتبني مثلهم
يخجل لساني شيكلهه
ذني بفلوس الحواسم
لو بكتل الابرياء
لو سمانا أتذب دفاتر
عالخلك ذبت حملهه
شلون فجئه أغتنت كلهه
الله يبعدنه يبنتي
عن هالبيوت الجديده
وعن هالعقول البليده
وعن أوادم آدميتهم بعيده
هسه جاري
يريد فرصه يبوك بيتي
ويضرب الضربه السديده
وجاري الآخر
عينه عالباب ويباوع
بلكت ينول اليريده
وجاري الآخر مقتنع
بس مايرفع أيده
وآنه شاعر
دمعه من عيني قصيده
وهمسه من شفتي قصيده
وصرخه مني تسوي ثوره
تشيل العروش العنيده
ورحت أشوف أم اليتامى
أتذكرت ما عايدتها
العيد فات وهيه محد مر عليهه
ظلت بكوخ الكرامه
تعيش مهجوره اوحيده
شلونهه الحجيه
كالت
هذا عيد الله الجبير
ومحد اتذكرني غيرك
كالي أيامج سعيده